Eintitis chultúrtha uile-Eorpacha
Is é is aidhm don ghníomhaíocht seo de chuid an chláir Eoraip na Cruthaitheachta tacaíocht a thabhairt d’eintitis chultúrtha, cuir i gcás ceolfhoirne, a bhfuil raon geografach leathan acu agus arb aidhm dóibh deiseanna oiliúna, gairmiúlaithe agus léirithe a chur ar fáil do cheoltóirí óga ardchumasacha.
Tacaíocht a thabhairt do cheolfhoirne a mhúnlaíonn todhchaí chultúrtha na hEorpa
Tacaíonn gníomhaíocht na n-eintiteas cultúrtha uile-Eorpach (PECE) faoin gclár Eoraip na Cruthaitheachta le ceolfhoirne a chothaíonn ceoltóirí a bhfuil gealladh fúthu agus iad ag teacht chun cinn, a leathnaíonn rochtain ar chultúr, agus a spreagann luchtanna éisteachta éagsúla. Ní hamháin gur ambasadóirí cultúrtha iad na ceolfhoirne sin ach is tionscnóirí bhunluachanna an Aontais Eorpaigh iad freisin, mar atá:
- saoirse ealaíonta
- éagsúlacht
- dlúthpháirtíocht
- inbhuanaitheacht
Cad é is cuspóir do ghníomhaíocht na n-eintiteas cultúrtha uile-Eorpach?
Cuidíonn an ghníomhaíocht sin le ceoltóirí óga i gceolfhoirne fás go healaíonta agus go gairmiúil. Cuireann sí le beartas cultúrtha an Aontais tríd an méid seo a leanas a dhéanamh:
- rochtain ar cheol agus ar chultúr a leathnú thar theorainneacha
- barr feabhais agus éagsúlacht ealaíne a chur chun cinn
- nuálaíocht agus cleachtais inbhuanaithe a spreagadh i gcruthú agus léiriú an cheoil agus rannpháirteachas an lucht éisteachta a spreagadh
Téamaí agus tosaíochtaí
Is ar an méid seo a leanas a dhíríonn ceolfhoirne Eorpacha a dtacaítear leo faoin ngníomhaíocht seo:
- foghlaim agus forbairt scileanna
- rannpháirtíocht na hóige agus an athléimneacht earnála
- saoirse an léirithe ealaíonta, na soghluaisteachta agus an chomhair trasteorann
- éagsúlacht, comhionannas, cuimsiú
- daonlathas agus dlúthpháirtíocht tríd an gcultúr, tacaíocht don Úcráin san áireamh
- inbhuanaitheacht agus gníomhú ar son na haeráide
- nuálaíocht i gcleachtas ealaíonta agus rannpháirteachas an lucht éisteachta
Buaicphointí roghnúcháin 2021
Le haghaidh na tréimhse 2021-2023, chómhaoinigh an tAontas Eorpach 4 eintiteas chultúrtha uile-Eorpacha i réimse na gceolfhoirne. Chuir na tionscadail sin ar a gcumas do bhreis agus 800 ceoltóir óg Eorpach páirt a ghlacadh i ngníomhaíochtaí na dtionscadal ar leibhéil éagsúla.
Buaicphointí roghnúcháin 2024
In 2024, leithdháil an ghníomhaíocht thart ar €11 mhilliún ar 5 thionscadal nua, arna n-óstáil sna tíortha seo:
- an Ostair
- an Ghearmáin
- an Mhacadóin Thuaidh
- an Phortaingéil
- an Spáinn
Tacaíonn na tionscadail sin le ceoltóirí atá ag teacht chun cinn ó 20 tír ar a laghad atá rannpháirteach sa chlár Eoraip na Cruthaitheachta. Is léiriú bríomhar iad ar thírdhreach ceoil saibhir agus athraitheach na hEorpa a chuimsíonn seánraí éagsúla amhail ceol barócach, clasaiceach, comhaimseartha, córúil, siansach, traidisiúnta, snagcheoil, ceol scannáin agus ceol meán digiteach.
I measc a ngníomhaíochtaí tá ceoldrámaí, saothair chórúla shiansacha, saothair nua, agus taifeadtaí gairmiúla.
Last updated: