Lár cathracha stairiúla atá buailte ag an meathlú fisiceach, coinbhleachtaí sóisialta agus drochmhianach saoil, is é is aidhm don tionscadal iad sin a iompú ó bhonn ina gCeantair Chruthaitheacha Inbhuanaithe, trí úsáid a bhaint as próisis chomhshaoil, shóisialta agus eacnamaíocha atá inbhuanaithe.

Forbraíonn ROCK cur chuige córasach ciorclach nuálach agus cuireann sé an cur chuige sin i bhfeidhm chun gníomhaithe éagsúla, áiteanna a bhfuil luach na hoidhreachta cultúrtha leo agus córais eile a cheangal le chéile ar leibhéal na hEorpa agus ar an leibhéal áitiúil araon. Chaith ROCK le lár cathracha stairiúla mar a bheadh saotharlanna iontu, chun léiriú a thabhairt ar an dóigh ar féidir leis an oidhreacht chultúrtha a bheith mar cheann feadhna ar an athnuachan, ar an bhforbairt inbhuanaithe agus ar an bhfás eacnamaíoch. Tá sraith dea-chleachtas curtha i bhfeidhm ag an tionscadal i suíomhanna tástála in Bologna, i Liospóin agus in Skopje.

Le ceithre bliana anuas nó mar sin, tá réitigh nuálacha á bhforbairt ag na deich gcathair sa tionscadal ROCK a léiríonn an dóigh ar féidir leis an oidhreacht chultúrtha a bheith ina ceann feadhna ar an inbhuanaitheacht uirbeach. Thug comhpháirtithe an tionscadail tacaíocht dóibh, mar shampla soláthraithe seirbhíse, ollscoileanna, líonraí fiontar, gnólachtaí agus gníomhaireachtaí forbartha, chun tástáil a dhéanamh ar uirlisí agus ar chuir chuige, agus iad sin a chur chun cinn, darb aidhm athnuachan uirbeach inbhuanaithe a mhúnlú faoi réir na hoidhreachta cultúrtha.

Ar na réitigh nuálacha oiliúna atá acu tá clár cothaithe chun borradh a chur faoi chruthú gnólachtaí glasa cruthaitheacha i ngach cathair, agus ceardlanna éiceanuálaíochta chun an nuálaíocht inbhuanaithe ghnó a spreagadh trí shaineolas a mhalartú idir FBManna glasa agus éicifhiontraithe ar fud na hEorpa. Chuir an tAontas €9,873,585 le buiséad foriomlán an tionscadail.