Tip ta' proġett: governanza, sostenibbiltà 

Sponsor prinċipali: il-belt ta’ Toulouse 

Sena ta’ tlestija: 2023

Erja totali:  118 km² (il-belt ta’ Toulouse)

Belt / sfond reġjonali

Toulouse, bil-pożizzjoni tagħha fil-Lbiċ ta’ Franza, tliet Siti ta’ Wirt Dinji tal-UNESCO, u industrija ajrunawtika u spazjali dinamika, hi belt attraenti ħafna. Matul dawn l-aħħar għaxar snin, kibret b’medja ta’ 5,000 abitant fis-sena. Kull sena, jeħtieġ li jinbnew madwar 3,500 unità ta’ akkomodazzjoni ġdida, u ż-żoni tan-negozju jridu jiġu estiżi. Madankollu, din l-espansjoni s’issa saret mingħajr viżjoni ġenerali. 

F’belt b’densità għolja ta’ popolazzjoni bħal Toulouse, l-isfida hi li tippjana b’mod li l-belt tibqa’ attraenti u abitabbli minkejja d-densità għolja tagħha. Dan ifisser 

• Il-preservazzjoni tal-ispazji ekoloġiċi  
• Il-promozzjoni ta’ arkitettura ta’ kwalità li tikkontribwixxi għaż-żamma ta’ identità b’saħħitha permezz tal-ambjent mibni  
• L-iżvilupp ta’ faċilitajiet għat-trasport pubbliku, għall-mixi u għaċ-ċikliżmu  
• L-iżgurar li l-ħwienet, is-servizzi u l-postijiet tax-xogħol ikunu f’distanza ta’ 15-il minuta bil-mixi jew bir-rota 

Toulouse hi esposta wkoll b’mod partikolari għat-temperaturi għoljin tas-sajf u tisħin żejjed urban. Dawn jheddu mhux biss is-saħħa tar-residenti iżda wkoll il-bijodiversità lokali. 

Soluzzjoni

Fl-2016, Toulouse nediet il-Proġett Urban ta’ Toulouse biex tiggwida l-iżvilupp urban fost il-kostruzzjoni rapida. Din l-inizjattiva ssawwar it-tkabbir territorjali tal-belt b’perspettiva fit-tul sal-2040. Dan jinvolvi strateġiji urbani kollaborattivi u viżjoni maqsuma fost diversi partijiet ikkonċernati filwaqt li joffri soluzzjonijiet prattiċi għal proġetti ta’ bini ġodda. Wara l-Manifest tal-2018 li jiddeskrivi l-viżjoni urbana ta’ Toulouse, u l-Pjan Regolatorju tal-Belt tal-2019, il-pjanijiet prinċipali speċifiċi għad-distrett (2023) jagħtu dettalji dwar kif il-pjan prinċipali japplika għas-setturi, id-distretti u t-toroq. 

 Il-belt żviluppat għodod għal djalogi kostruttivi mal-arkitetti u l-iżviluppaturi tal-proprjetà, li jistabbilixxu kriterji ta’ kwalità u linji gwida għal kull wieħed mis-sitt distretti ewlenin tal-belt. Wara tliet snin ta’ ħidma teknika u parteċipazzjoni estensiva taċ-ċittadini, ir-riżultat hu sett ta’ sitt fuljetti magħrufa bħala l-“Cahiers Toulousains.” 

Dawn il-fuljetti jkopru firxa ta’ oqsma ta’ politika inklużi l-akkomodazzjoni, in-natura, l-ekonomija, il-faċilitajiet u l-inklużjoni. Huma jindirizzaw kwistjonijiet vitali bħall-preservazzjoni tal-identità tal-viċinat, it-tisħiħ tal-ispazji ekoloġiċi, it-titjib taż-żoni pubbliċi, l-iffaċilitar tal-mobbiltà, it-tisħiħ tal-ekonomija, u l-arrikkiment tad-diversità arkitettorali u urbana tal-belt. Punt ċentrali hu li jinstabu soluzzjonijiet klimatiċi, b’kull fuljett li joffri miżuri olistiċi u speċifiċi għall-kuntest ta’ mitigazzjoni u adattament għat-tibdil fil-klima għal kull viċinat.

Kriterji għal kwalità għolja (kuntest, sens ta’ post, diversità, sbuħija)

• Il-fuljetti jiddefinixxu linji gwida li huma rilevanti għall-kuntest naturali u mibni ta’ kull viċinat. Dawn jipprovdu analiżi bir-reqqa tal-identità u l-evoluzzjoni urbana ta’ kull distrett, u joffru perspettiva storika, soċjoloġika u arkitettorali dwar iż-żona.  
• Il-linji gwida tal-fuljetti se jintużaw fil-proġetti kollha relatati mal-ambjent mibni. Dawn jgħinu lill-managers lokali jiddeċiedu jekk proġett ta’ kostruzzjoni hux rilevanti jew le, u biex jaraw mal-mexxej tal-proġett (pubbliku jew privat) kif jista’ jittejjeb skont il-kuntest lokali. 
• Ġie implimentat proċess ta’ parteċipazzjoni innovattiv u ambizzjuż li ġabar aktar minn 2,000 kontribuzzjoni fuq sena. It-tim tal-proġett iltaqa’ ma’ residenti, ħaddiema, u viżitaturi minn viċinati, etajiet, u sfondi soċjali differenti madwar il-belt.  Ir-riżultat? Karta tal-identità għal kull wieħed mis-sitt distretti, li tgħin biex tinżamm ir-rabta tal-bniedem mal-postijiet li jkunu għaddejjin minn trasformazzjoni urbana. 
• Għalkemm dokumenti tekniċi, il-fuljetti huma miktubin sabiex kulħadd ikun jista’ jaqrahom biex jesplora l-passat, il-preżent u l-futur tal-viċinat, u jifhem l-iżvilupp urban fit-toroq, id-distrett u l-belt tiegħu. 

Ippjanar u mmaniġġar

Il-proġett kien immaniġġat minn Direttur tal-Proġett u Manager tal-Proġett mid-Dipartiment tal-Prospettiva u l-Istrateġija Urbana għal tliet snin. Dawn kienu appoġġjati mill-aġenzija tal-ippjanar urban ta’ Toulouse (AUAT) b’ħames arkitetti, pjanifikaturi urbani, u arkitetti tal-pajsaġġ għall-parti teknika tal-Fuljetti. 

B’mod ġenerali, madwar 50 dipartiment tal-Belt u Metropolis ikkollaboraw fuq il-proġett (it-trasport, id-demokrazija lokali, l-ambjent, l-ippjanar urban, l-ekonomija, l-ispazji pubbliċi, il-ġonna pubbliċi, il-wirt urban, il-komunikazzjoni, eċċ.), u ħadu sehem f’madwar 50 workshop tekniku. 

L-arkitetti u l-kumpaniji tal-proprjetà kif ukoll ir-residenti ta’ Toulouse kienu involuti f’konsultazzjonijiet.

Baġit u finanzjament

Baġit totali: €1,200,000 iffinanzjati mill-Belt ta’ Toulouse. 

Miljun euro ntefqu fuq studji, €200,000 fuq il-proċess ta’ konsultazzjoni maċ-ċittadini, u ġie miżjud baġit żgħir għall-ipprintjar. 

Ideat trasferibbli

Pariri mill-belt/reġjun: 

• Involvu lid-dipartimenti muniċipali kollha biex tinbena viżjoni maqsuma mill-bidu nett sabiex il-pjan ewlieni tal-belt ikun opportunità biex jissaħħu l-prattiki tajba eżistenti u jiġu ispirati proġetti ġodda. 
• Iġbru appoġġ politiku qawwi għall-proġett billi tinvolvu lill-uffiċjali eletti lokali kollha fil-proċess.  
• Kunu innovattivi, ambizzjużi u miftuħin fit-tfassil tal-pjan ġenerali urban, sabiex l-istorja tal-belt u l-linji gwida definiti jkunu soluzzjonijiet verament lokali.