Select your language

Bħala parti minn Orizzont Ewropa, il-programm tal-Ekosistemi tal-Innovazzjoni Ewropej (EIE) għandu l-għan li joħloq ekosistemi tal-innovazzjoni aktar konnessi, inklużivi u effiċjenti u jappoġġja l-iskalar tal-kumpaniji, kif stabbilit fl-Aġenda Ewropea l-Ġdida għall-Innovazzjoni.

L-ekosistemi tal-innovazzjoni jlaqqgħu flimkien nies jew organizzazzjonijiet li l-għan tagħhom huwa l-innovazzjoni, u jinkludu r-rabtiet bejn ir-riżorsi (bħal fondi, tagħmir, u faċilitajiet), l-organizzazzjonijiet (bħal istituzzjonijiet tal-edukazzjoni għolja, organizzazzjonijiet tar-riċerka u t-teknoloġija, kumpaniji, kapitalisti ta’ riskju u intermedjarji finanzjarji), l-investituri u dawk li jfasslu l-politika.

L-azzjonijiet appoġġjati mill-Ekosistemi tal-Innovazzjoni Ewropej jikkomplementaw l-azzjonijiet imwettqa mill-EIC u mill-Istitut Ewropew tal-Innovazzjoni u t-Teknoloġija (EIT), l-attivitajiet madwar Orizzont Ewropa, l-inizjattivi fil-livelli nazzjonali, reġjonali u lokali kif ukoll l-inizjattivi privati u tat-tielet settur.