Premju tal-Unjoni Ewropea għal-Letteratura

L-għanijiet tal-premju

Il-Premju għandu l-għan li:

• juri d-diversità tal-Ewropa u r-rikkezza tal-letteratura kontemporanja
• ikabbar il-profil ta’ dawk kollha nominati lil hinn mill-fruntieri nazzjonali u lingwistiċi, u jgħinhom jilħqu aktar qarrejja
• jippromwovi l-pubblikazzjoni, it-traduzzjoni, il-bejgħ u, wara kollox, il-qari tal-kotba fl-Ewropa
• iħeġġeġ interess akbar f’xogħlijiet letterarji minn pajjiżi oħra, kemm fl-Ewropa kif ukoll lil hinn minnha

Kif jiġi organizzat il-premju

Il-Premju għandu ċiklu ta’ tliet snin: kull sena, jipparteċipaw terz tal-pajjiżi tal-Ewropa Kreattiva, permezz ta’ entitajiet letterarji nazzjonali li jinnominaw ktieb skont kriterji stretti. Wara li jevalwaw il-kampjuni tradotti kollha tal-kotba nominati, is-seba’ ġurati Ewropej jiddistingwu ħames referenzi speċjali għall-kisbiet letterarji tagħhom u l-potenzjal tagħhom li jagħmlu impatt fil-livell internazzjonali, kif ukoll rebbieħ ġenerali wieħed. 

Tingħata promozzjoni kontinwa madwar l-Ewropa lill-awturi nominati kollha, bil-għan li tintlaħaq udjenza internazzjonali usa’, u li jkun hemm konnessjoni mal-qarrejja lil hinn mill-fruntieri nazzjonali u lingwistiċi tagħhom.

Iċ-ċiklu attwali huwa organizzat minn konsorzju magħmul mill-Federazzjoni tal-Pubblikaturi Ewropej (FEP) u l-Federazzjoni Internazzjonali u Ewropea tal-Bejjiegħa tal-Kotba (EIBF), li flimkien huma responsabbli għall-implimentazzjoni tal-Premju fil-prattika.