Monitoraġġ

Il-Bord taċ-Ċertifikat tal-Patrimonju Ewropew, li hu magħmul minn esperti indipendenti, jimmonitorja s-siti ċċertifikati fuq bażi regolari f’kooperazzjoni mal-Istati Membri parteċipanti. L-għan tal-monitoraġġ hu li jiġi żgurat li s-siti ċċertifikati jkomplu jissodisfaw il-kriterji għall-attribuzzjoni taċ-Ċertifikat.

Il-monitoraġġ isir skont il-kalendarju stabbilit fl-Anness tad-Deċiżjoni Nru 1194/2011/UE li tistabbilixxi l-azzjoni.

Punti ewlenin tar-rapport ta’ monitoraġġ tal-2020

Fl-2020, il-Bord Ewropew wettaq it-tieni monitoraġġ tas-siti taċ-Ċertifikat tal-Patrimonju Ewropew u approva l-konklużjonijiet u r-rakkomandazzjonijiet ewlenin li ġejjin:

Is-siti kollha jissodisfaw il-kriterji tal-għażla inizjali

Il-Bord ikkonkluda li t-38 sit kollha mmonitorjati fl-2020 għadhom jissodisfaw il-kriterji għall-għoti taċ-Ċertifikat tal-Patrimonju Ewropew. Dan hu bis-saħħa tal-attivitajiet tagħhom biex isaħħu s-sens ta’ appartenenza taċ-ċittadini Ewropej fl-Unjoni, b’mod partikolari dak taż-żgħażagħ, u biex jibnu djalogu interkulturali.

Minn 4 sa 48 sit iċċertifikat

Mill-ewwel għażla fl-2013, in-numru ta’ siti taċ-Ċertifikat tal-Patrimonju Ewropew kiber minn 4 għal 48 u n-numru ta’ Stati Membri parteċipanti żdied minn 5 għal 25. L-aħħar 7 snin raw numru dejjem jikber ta’ kollaborazzjonijiet produttivi bejn is-siti taċ-Ċertifikat tal-Patrimonju Ewropew kif ukoll ma’ sħab oħrajn, inklużi istituzzjonijiet edukattivi.

Azzjoni flessibbli li tiffaċilita l-kooperazzjoni

Fattur ewlieni ta’ suċċess taċ-Ċertifikat tal-Patrimonju Ewropew hu li l-azzjoni tipprovdi opportunitajiet għal interazzjonijiet simultanjament minn fuq għal isfel, orizzontali u minn isfel għal fuq bejn l-atturi differenti, inklużi l-Kummissjoni Ewropea, ir-rappreżentanti tas-siti taċ-Ċertifikat tal-Patrimonju Ewropew, il-Koordinaturi Nazzjonali u l-Bord Ewropew. Dawn l-interazzjonijiet jiffaċilitaw forom differenti ta’ komunikazzjoni u kooperazzjoni bejn il-parteċipanti tal-azzjoni taċ-Ċertifikat tal-Patrimonju Ewropew.

Is-siti magħżulin jeħtieġu aktar appoġġ biex jiżdied ir-rikonoxximent tagħhom

Fl-aħħar nett, il-Bord Ewropew irrakkomanda li l-Kummissjoni Ewropea tagħti aktar appoġġ lis-siti u lin-Network taċ-Ċertifikat tal-Patrimonju Ewropew sabiex jintlaħaq livell saħansitra ogħla ta’ integrazzjoni u jiżdied ir-rikonoxximent internazzjonali.

Sib ir-rapporti ta’ monitoraġġ tal-2020 u dawk preċedenti taċ-Ċertifikat tal-Patrimonju Ewropew fl-aħħar ta’ din il-paġna.

Evalwazzjoni tal-azzjoni taċ-Ċertifikat tal-Patrimonju Ewropew

Kumitat ta’ esperti wettaq l-ewwel evalwazzjoni tal-azzjoni taċ-Ċertifikat tal-Patrimonju Ewropew fl-2018. L-evalwazzjoni eżaminat il-progress tal-implimentazzjoni mill-2011 sal-2017.

Evalwazzjonijiet li tqiesu

• ir-rilevanza
• il-koerenza
• l-effiċjenza
• il-governanza
• l-effettività
• il-valur miżjud tal-UE

Ir-rapport sab li l-objettivi ewlenin tal-azzjoni – it-tisħiħ tas-sens ta’ appartenenza tan-nies fl-Unjoni u t-trawwim tad-djalogu interkulturali – huma rilevanti ħafna għall-ħtiġijiet attwali tal-UE.

Ir-rapport jirrakkomanda li l-azzjoni għandha titwessa’ billi jiġu żviluppati u kkomunikati n-narrattivi Ewropej tas-siti, billi s-siti jiġu megħjunin jaħdmu aktar mill-qrib flimkien, u billi jikkontribwixxu għall-bini tal-kapaċità tagħhom.