Cuspóirí na duaise
Leis an Duais, táthar ag iarraidh an méid seo a leanas a bhaint amach:
- léargas a thabhairt ar éagsúlacht agus saibhreas na hEorpa ó thaobh an fhicsin chomhaimseartha de
- próifíl na n-údar iomráiteach a ardú lasmuigh dá dtír dhúchais agus cuidiú leo teorainneacha a thrasnú agus léitheoirí níos faide i gcéin a mhealladh chuig a saothair
- foilsiú, aistriúchán, díolachán agus léitheoireacht na leabhar ó thíortha Eorpacha eile a chur chun cinn
- cúrsaíocht thrasnáisiúnta na litríochta a spreagadh san Eoraip agus níos faide i gcéin
An dóigh a n-eagraítear an Duais
Gach bliain i mí Feabhra, ainmnítear 14 scríbhneoir agus a gcuid leabhar go náisiúnta, is é sin scríbhneoir amháin ag gach tír rannpháirteach. Cuirtear na húdair ainmnithe uile chun cinn ar fud na hEorpa, agus is é an aidhm atá ann pobal idirnáisiúnta níos leithne a bhaint amach, agus nascadh le léitheoirí lasmuigh dá dteorainneacha náisiúnta agus teanga. I mí Aibreáin bronnann giúiré Eorpach a bhfuil seachtar ann ‘Grand Prix’ amháin agus 5 mholadh speisialta i gcatagóirí éagsúla ó liosta na 14 scríbhneoir ainmnithe.
Is i dtimthriallta 3 bliana a bhíonn an Duais, rud a fhágann gur féidir le gach ceann de na 41 thír rannpháirteach sa chlár Eoraip na Cruthaitheachta scríbhneoir a ainmniú. Tá an timthriall reatha á eagrú ag cuibhreannas ina bhfuil Cónaidhm Fhoilsitheoirí na hEorpa (FEP) agus Cónaidhm Dhíoltóirí Leabhar na hEorpa agus an Domhain (EIBF).