Le cuibhreannas ildisciplíneach Fhaireachlann na Meánmhara um na Meáin Dhigiteacha, tugtar le chéile eagraíochtaí taighde, eagraíochtaí seiceála fíricí agus eagraíochtaí de chuid na meán a dhéanann obair agus gníomhaíocht taighde a aithnítear go hidirnáisiúnta i réimse na bréagaisnéise chun feachtais bhréagaisnéise dhíobhálacha atá ag teacht chun cinn a bhrath, a anailísiú agus a nochtadh agus aghaidh a thabhairt ar an tionchar atá acu ar an tsochaí agus ar an daonlathas.

Le hobair na Faireachlainne, leathnófar cumhdach réigiúnach na Faireachlainne Eorpaí um na Meáin Dhigiteacha (EDMO) i dtrí thír in Oirdheisceart na hEorpa (an Ghréig, an Chipir agus Málta). Tá dúshláin den chineál céanna roimh na tíortha sin maidir le feachtais bhréagaisnéise a dhéanann iarracht go minic díospóireacht an Aontais maidir le saincheisteanna inimirce agus rialaithe teorann a dheighilt. 

Bunaithe ar arduirlisí agus ar mhodheolaíochtaí oibríochtúla, déanfaidh Faireachlann na Meánmhara um na Meáin Dhigiteacha gach iarracht bréagaisnéis a bhrath, feachtais bhréagaisnéise a anailísiú, oiliúint a chur ar ghairmithe a bhfuil cúlraí agus saineolas éagsúil acu agus iad a thabhairt le chéile, agus saoránaigh a chumhachtú ar an leibhéal réigiúnach, náisiúnta agus ar leibhéal an Aontais. 

Tá sé i gceist go háirithe leis an tionscadal gníomhaíochtaí litearthachta sna meáin, ábhar oiliúna i gcuraclaim na bpríomh-ranna a bhaineann leis an iriseoireacht, agus feachtais feasachta a chruthú.

Seoladh an tionscadal i mí na Nollag 2022 agus tiocfaidh deireadh leis i mí na Bealtaine 2025. Is é Lárionad Hellas um Thaighde agus Teicneolaíocht (an Ghréig) a chomhordaíonn é, agus tugann sé le chéile 8 gcomhpháirtí ón gCipir, ó Mhálta, ón nGréig agus ón bhFrainc.