Ócáid chultúrtha is ea an Fhéile ina seolann loingeas bád ó cheann thuaidh Loch Peipus go dtí an ceann theas thar thréimhse 8-10 lá gach samhradh, agus ag stopadh i gcuan éagsúil gach lá. Bíonn deis ag na rannpháirtithe eolas a chur ar an gcultúr áitiúil, ar an oidhreacht áitiúil agus ar an mbia áitiúil ar bhealaí cruthaitheacha éagsúla.

Bhí an Fhéile mar chuid d’fheachtas margaíochta agus forbartha níos mó a d’fhéach le borradh a chur faoin turasóireacht, faoin bhforbairt agus faoin bhfeasacht ar chultúr ilghnéitheach cósta Peipsimaa (dúiche Peipus), ceantar a bhí tite ar gcúl go heacnamaíoch i gcomparáid leis an gcuid eile den tír. Chuir an Fhéile gníomhaíochtaí bádóireachta agus seoltóireachta chun cinn, mar aon le himeachtaí a rinne an cultúr agus an oidhreacht bhádóireachta áitiúil a chaomhnú. Spreagadh úinéirí agus díograiseoirí bád le dul ag seoltóireacht le loingeas na féile agus le páirt a ghlacadh sna himeachtaí féin. Eagraíodh ceardlanna éagsúla (bia, gníomhartha tarrthála uisce, iascaireacht, tógáil mionsamhlacha loinge) agus gníomhaíochtaí i ngach cuan, chomh maith le ceolchoirmeacha saor in aisce. Ina theannta sin, chuaigh an fhéile i gcomhpháirt leis an Ionad Faisnéise Iascaigh maidir le roinnt ceardlanna oideachais iascaigh a sholáthar.

Bhí idir phobail na háite agus chuairteoirí an-sásta leis an tionscadal agus tá méadú mór tagtha ar líon na n-árthaí a bhíonn páirteach san Fhéile ó cuireadh tús leis den chéad uair in 2017. Tar éis céim phíolótach rathúil den tionscnamh, cuireadh tionscadal comhair ar bun idir ceithre Ghrúpa Gníomhaíochta Áitiúla (LAG) agus Grúpa Áitiúil Gníomhaíochta Iascaigh (FLAG) amháin d’fhonn an t-imeacht a mhéadú trí chuidiú leis na costais mhargaíochta, chumarsáide agus eagrúcháin a chumhdach agus, ar an dóigh sin, sineirgí a chothú idir na cistí atá ar fáil tríd an gCiste Eorpach Talmhaíochta um Fhorbairt Tuaithe (CETFT) agus tríd an gCiste Eorpach Muirí, Iascaigh agus Dobharshaothraithe (CEMID).

Fuair an tionscadal tacaíocht ó líon mór gníomhaithe, amhail Comhlachas Forbartha Tuaithe Tartu, comhlachas Comhair Jõgevamaa, Borderlands LEADER, Comhlachas Comhair PeipsiAlutaguse agus Comhlachas Forbartha Limistéar Iascaigh Peipus. Ba é €38,000 an buiséad iomlán a bhí ag an tionscadal, agus tháinig €25,200 de sin ón Aontas Eorpach.