Is é atá in FARNET pobal daoine a bhfuil forbairt áitiúil faoi stiúir an phobail (CLLD) á cur chun feidhme acu faoin gCiste Eorpach Muirí agus Iascaigh (CEMI). Sa phobal seo, tugtar le chéile Grúpaí Áitiúla Gníomhaíochta Iascaigh (FLAGanna), údaráis bhainistíochta, saoránaigh agus saineolaithe ó gach cearn den Aontas, chun obair a dhéanamh ar fhorbairt inbhuanaithe iascaigh agus limistéar cósta. Roimhe seo, is minic a tugadh tacaíocht faoin tionscnamh seo do thionscadail a bhaineann leis na healaíona agus leis an gceardaíocht, agus leis an oidhreacht chultúrtha.
Is é Ciste Sóisialta na hEorpa Plus (CSE+) príomhionstraim na hEorpa chun infheistíocht a dhéanamh sna daoine.
Agus buiséad ag CSE+ ina bhfuil beagnach €99.3 billiún don tréimhse 2021-2027, leanfaidh sé de rannchuidiú tábhachtach a thabhairt do bheartais fostaíochta, shóisialta, oideachais agus scileanna an Aontais, agus athchóirithe struchtúracha sna réimsí sin san áireamh.
Is cuid de Bheartas Comhtháthaithe an Aontais Eorpaigh é CFRE agus tá sé d’aidhm aige comhtháthú eacnamaíoch, sóisialta agus críochach an Aontais Eorpaigh a neartú trí mhíchothromaíochtaí idir na réigiúin a cheartú, trí thacú le téarnamh eacnamaíoch, le cruthú post, leis an iomaíochas, leis an nuálaíocht agus leis an inbhuanaitheacht. Cuireann sé tosaíochtaí polaitiúla an Aontais i gcrích, go háirithe an t-aistriú glas agus an t-aistriú digiteach.
Spreagfaidh Saotharlann na Nuálaíochta Cruthaithí gníomhaithe in earnálacha uile an chultúir agus na cruthaitheachta chun réitigh dhigiteacha nuálacha a dhearadh agus a thástáil a bhféadfadh tionchar dearfach fadtéarmach a bheith acu ar earnálacha éagsúla de chuid an chultúir agus na cruthaitheachta.