L-NFTs għandhom każijiet ta’ użu fl-industriji kollha: mill-protezzjoni tal-identità diġitali (jagħtu kontroll sħiħ lill-individwi fuq liema informazzjoni għandhom jaqsmu u ma' min) sal-Internet tal-Oġġetti (bħala awtentikatur tal-apparat) u s-setturi kreattivi (jipprovdu likwidità fl-irkanti u fis-setturi tal-arti, tal-mużika, tal-moda u tal-logħob tal-azzard).
Peress li prattikament kwalunkwe ħaġa li tista' tiġi diġitalizzata tista' tinbidel f'NFT, l-NFTs jista' jkollhom rwol ewlieni fil-protezzjoni tad-drittijiet tal-Proprjetà Intellettwali (PI) billi jipprovdu ċertifikat diġitali uniku tad-drittijiet tal-PI, referenzjati fir-reġistru distribwit, lill-inventuri, lir-riċerkaturi u lil min joħloq.

Il-pjattaforma Ewropea proposta tal-NFT tkun tmexxi dan il-każ ta' użu. Din tkun tesplora l-potenzjal tal-NFTs u tal-blockchain li jiffunzjonaw bħala rekord immutabbli tal-pretensjonijiet tas-sjieda u tkun tippermetti l-verifika u l-awtentikazzjoni tas-sjieda u tal-liċenzji kif ukoll il-ġestjoni tad-drittijiet tal-PI. Hi għandha tesplora kif tista’ tiġi applikata biex jiġu ttrasferiti d-drittijiet diġitali u d-drittijiet tal-awtur, jiġi identifikat il-ksur tad-drittijiet tal-awtur, u jiġu evitati pretensjonijiet żbaljati dwar is-sjieda. Il-proġett jidentifika l-infrastruttura bażika, l-istandards u l-protokolli meħtieġa għall-implimentazzjon u t-tkabbir tal-użu tal-NFTs u l-blockchain għall-protezzjoni tal-PI fl-Unjoni, u l-potenzjal tagħhom li jinkoraġġixxu l-innovazzjoni.

Il-proposta hija rilevanti wkoll hekk kif l-ispazji tad-data Ewropej jibdew jissawru (inkluż f’oqsma bħall-wirt kulturali u l-media), li għandhom l-għan li jippromwovu l-flussi tad-data u l-innovazzjoni mmexxija mid-data, fejn id-drittijiet tal-PI għandhom rwol ewlieni.