Stiúideonna ailtireachta: Motto Ltd

Príomhurraitheoir: Cathair Burgas

An bhliain a cuireadh an tionscadal i gcrích: 2020

Ábhair: Coincréit, cruach, alúmanam

Achar iomlán: 8645 m2

Cathair / cúlra réigiúnach

Tógadh Ionad Cultúrtha NHK in 1975, agus tá sé suite ar phríomhchearnóg na cathrach. Sampla maith den nua-aoiseachas sóisialach is ea ailtireacht an ionaid.

Ar feadh na mblianta, bhí sé i gcroílár shaol cultúrtha chathair Burgas. Bhí an foirgneamh ar aon dul leis an gceantar máguaird, ina raibh foirgnimh ísle agus spásanna glasa.

Sna 2010í tháinig athruithe tapa ar an gcearnóg. Tógadh dhá fhoirgneamh nua 9 n-urlár, rinneadh athdhearadh iomlán ar an gcearnóg, agus tógadh sráid nua faoin talamh.

Deonaíodh Ionad Cultúrtha NHK ar bhardas Burgas in 2014, agus chinn sé ina dhiaidh sin é a atógáil agus a athchóiriú le comórtas dearaidh ailtireachta. Ba é an aidhm a bhí ann leibhéal seirbhíse níos fearr a chur ar fáil do shaoránaigh agus an foirgneamh a chomhtháthú leis an tírdhreach uirbeach ar bhealach níos fearr.

Comhlíonann an tionscadal na prionsabail a leagtar amach i bhfoilseachán bardasach dar teideal The shape of Urban Spaces, Buildings and Architectural Ensembles, [Cruth spásanna uirbeacha, foirgneamh agus cnuasach ailtireachta] ina leagtar amach riachtanais shonracha maidir le cuma gach comhpháirte den timpeallacht thógtha, rud a chuireann le meon na haontachta maidir le críocha na cathrach.

Réiteach

Mar gheall ar an gcuma úr sin ar an gcearnóg, spreagadh an stiúideo ailtireachta athmhachnamh a dhéanamh ar mhúnla toirtmhéadrach Ionad Cultúrtha NHK. Cuireadh sceall nua déanta as cruach ar an bhfoirgneamh, rud a thug dealramh iomlán nua don fhoirgneamh, agus a thug aeistéitic chomhaimseartha dó a thagann leis an gceantar máguaird. 

Rinneadh roinnt athruithe místuama ar an bhfoirgneamh san am a chuaigh thart ó tógadh é, agus bhí cosc ar an imshruthú éasca laistigh dá bharr. Leis an tionscadal, fuarthas deis machnamh agus athchóiriú a dhéanamh ar leagan amach an fhoirgnimh, ach bhí deis ann freisin spásanna agus trealamh nua a chur leis. San ionad cultúrtha nua, tá 8 halla ilfheidhmeacha athchóirithe (bhí 4 halla ann roimhe seo) a chloíonn le caighdeáin inrochtaineachta.

Nuair ab fhéidir é, caomhnaíodh an leagan amach, na struchtúir agus na hábhair bhunaidh a bhí ina ndlúthchuid de charachtar ailtireachta an fhoirgnimh. Bhí na himbhallaí, na stráicí marmair, na mósáicí ar an urlár, na painéil adhmaid san fhorhalla, agus na ráillí san áireamh leis sin. Cuireadh frámaí miotail leis an mbunstruchtúr coincréite chun é a neartú.

Feabhsaíodh feidhmíocht fuinnimh an fhoirgnimh le hinsliú teirmeach, gloiniú nua, córas aerála aisghabhála teasa, córas teasa nua, agus fearas leictreachais agus pluiméireachta úrnua a chur isteach in ionad na seanchóras. Mar thoradh, laghdaíodh na costais oibriúcháin agus cuireadh feabhas ar chompord na n-úsáideoirí.

Critéir i leith an ardchaighdeáin (comhthéacs, tuiscint ar an áit, éagsúlacht, áilleacht)

• Leis an tionscadal, rinneadh an foirgneamh reatha a thabhairt isteach sa tsochaí chomhaimseartha, agus cuireadh a ghnéithe agus a fheidhmeanna in oiriúint do riachtanais úsáideoirí an lae inniu. Tá infreastruchtúr cultúrtha nua-aimseartha, tarraingteach, fuinneamhéifeachtúil ar fáil anois do mhuintir Burgas.
• Cuidíonn gnéithe nua toirtmhéadracha spásúla an fhoirgnimh chun an áit a lánpháirtiú arís sa tírdhreach chomhaimseartha uirbeach. Ón taobh istigh, baineann meon láidir aontachta leis an sceall i leith gach seomra, rud a chruthaíonn ómós láidir áite.
• Tríd an ngloine a bhaint den bhealach isteach agus naisc úra a chruthú leis an gclós agus leis an gcearnóg, tá an foirgneamh nua oscailte don taobh amuigh agus cuirtear fáilte roimh dhaoine teacht isteach.
• Éascaítear an idirghníomhaíocht idir úsáideoirí uile an fhoirgnimh leis an leagan amach nua a cruthaíodh idir na spásanna istigh agus na naisc eatarthu a rinneadh a optamú chuige sin.
• Sa tionscadal, meascadh an ailtireacht shóisialach agus chomhaimseartha le chéile i bhfís nua-aimseartha d’fhoirgneamh poiblí a bhfuil feidhm ilchultúrtha aige. Nuair a bhreathnaítear ar an bhfoirgneamh ó i bhfad i gcéin, tá an chuma air go bhfuil sé aonfhoirmeach, ach de réir mar a théitear níos giorra dó feictear na leibhéil éagsúla ailtireachta, idir shean agus nua, a thagann le chéile go snasta.

Pleanáil agus bainistíocht

Chuir Bardas Burgas foireann ceathrar saineolaithe ar fáil chun tacú le forbairt an tionscadail agus chun a chinntiú go mbeifí in ann é bhaint amach:

• Bainisteoir Tionscadail, ar innealtóir ó Roinn Tógála Bhardas Burgas é;
• Comhordaitheoir Tionscadail, ar saineolaí ón Roinn Forbartha Straitéisí é;
• Saineolaí Airgeadais ón Roinn Buiséid agus Airgeadais;
• Saineolaí Rialaithe Infheistíochta ón Roinn Tógála.

Buiséad agus maoiniú

€4.5 milliún an buiséad iomlán a bhí ag an tionscadal. Tháinig 90% den mhaoiniú sin ó Chiste Forbraíochta Réigiúnaí na hEorpa, tháinig 6% ón Stát agus tháinig 4% ón mbardas.

Smaointí inaistrithe

• Aon rud a bhfuil luach oidhreachta aige a chaomhnú, agus an foirgneamh iomlán athchóirithe a chomhtháthú arís le dearadh comhaimseartha nua-aoiseach.
• Gan eagla a bheith ort réitigh nua nuálacha a chomhtháthú.
• Na feidhmeanna atá ar fáil san fhoirgneamh a éagsúlú agus ionad cultúrtha á phleanáil chun riachtanais éagsúla a chomhlíonadh.