Tá roinnt ionstraimí agus clár maidir le cosc agus freagairt éigeandála i bhfeidhm ar leibhéal an Aontais. Tá Ard-Stiúrthóireachtaí éagsúla de chuid an Choimisiúin Eorpaigh páirteach i mbainistíocht na n-ionstraimí sin. Tá liosta na bpríomhshásraí le fáil thíos.

Sásra an Aontais um Chosaint Shibhialta (EUCPM)

Is iad na daoine go príomha a chlúdaítear leis an gcosaint a chinntítear faoin sásra seo, ach clúdaítear an comhshaol agus maoin léi freisin, an oidhreacht chultúrtha ina measc. Mar shampla, tar éis na gcreathanna talún a bhuail Meicsiceo in 2017 rinne Sásra an Aontais um Chosaint Shibhialta foireann a imscaradh go Meicsiceo, foireann ina raibh seisear saineolaithe oidhreachta cultúrtha. Rinne an fhoireann 33 chuairt allamuigh chun measúnú a dhéanamh ar chineál agus ar mhéid an damáiste a rinneadh don oidhreacht chultúrtha a buaileadh, agus shainaithin sí gníomhaíochtaí éigeandála agus straitéisí athchóirithe.

Chun an chosaint a ghníomhachtú, ní mór don tír ina dtarlaíonn an éigeandáil an t-iarratas ar chúnamh a sheoladh chuig an Lárionad Comhordúcháin Práinnfhreagartha.

Tuilleadh eolais faoi Shásra Aontais um Chosaint Shibhialta.

Copernicus

Cuidíonn Seirbhísí Copernicus, go háirithe an tSeirbhís Bainistithe Práinne, le Ballstáit an Aontais (agus tíortha eile údaraithe) tionchar na nguaiseacha geolaíocha a bhainistiú, idir chinn nádúrtha agus chinn neamhnádúrtha. Cabhraíonn Copernicus freisin le tíortha le linn teagmhais dhiana mheitéareolaíocha i gceantair nach bhfuil aon daonra. Is féidir leis an tseirbhís léarscáileanna mionsonraithe bunaithe ar shonraí satailíte agus faisnéis thíreolaíoch a sholáthar le haghaidh éigeandálaí.

Tuilleadh eolais faoin méid a thairgeann Seirbhís Copernicus mar thacaíocht don oidhreacht chultúrtha.

Tionscadail roghnaithe

Tionscadal STORM

Is tionscadal é seo a maoiníodh faoi Fís 2020 agus a sholáthraíonn uirlisí criticiúla cinnteoireachta do pháirtithe leasmhara a bhfuil baint acu le hoidhreacht chultúrtha na hEorpa agus atá ag tabhairt aghaidh ar an athrú aeráide agus ar ghuaiseacha nádúrtha.

Tuilleadh eolais faoin tionscadal STORM.

Tionscadal Hyperion

Is tionscadal é seo a maoiníodh faoi Fís 2020 agus a bhaineann leas as uirlisí, seirbhísí agus teicneolaíochtaí núíosacha arb ann dóibh cheana chun ardán measúnaithe athléimneachta comhtháite a fhorbairt le dul i ngleic le rioscaí ilghuaise. Is é sprioc an tionscadail freagairt níos tapúla, oiriúnaithe agus éifeachtúil a thairiscint, agus limistéir stairiúla a atógáil ar bhealach inbhuanaithe.

Tuilleadh eolais faoin tionscadal Hyperion.

An tionscadal ProCultHer

Arna chómhaoiniú ag an nGlao um Chosc agus Ullmhacht (2019-2021), cuireann an tionscadal seo le forbairt na mBuan-Nós Imeachta Oibríochta chun imscaradh saineolaithe a éascú chun an oidhreacht chultúrtha a choimirciú i gcás éigeandála.

Tuilleadh eolais faoin tionscadal ProCultHer.