Is é uaillmhian na réamhbhirt tús a chur le próiseas ar an leibhéal idirnáisiúnta ina gcuirtear nuálaíocht atá dírithe ar an ealaín chun cinn mar chonair chomhpháirteach mhalartach i dtreo na todhchaí do gheilleagair ar fud ilchríoch agus cultúr éagsúil. Tá sé beartaithe cur chuige Eorpach a chur chun cinn i leith na nuálaíochta atá fréamhaithe sna healaíona/sa chultúr agus i luachanna trí nuálaíocht dhigiteach agus glacadh digiteach a nascadh leis na healaíona in éiceachórais áitiúla i réigiúin roghnaithe lasmuigh den Eoraip - agus tá an Afraic fho-Shahárach ar cheann acu sin.                                                              

Bainfear úsáid as cur chuige nithiúil maidir le turgnamh ealaíonta le teicneolaíochtaí digiteacha chun glacadh teicneolaíochtaí digiteacha a chur chun cinn i ngeilleagair na réigiún roghnaithe agus chun úsáid an digitigh ar fud an domhain, ar bhealach atá ‘comhoiriúnach don duine’ agus atá comhfhiosach ó thaobh na héiceolaíochta de, a chur chun cinn. Leanann an ghníomhaíocht ar aghaidh leis an obair mar chuid de thionscadal píolótach.

Tabharfaidh an ghníomhaíocht aghaidh ar roinnt earnálacha atá ábhartha sna tíortha roghnaithe inar féidir leis an digitiú difear a dhéanamh. I bhfianaise thábhacht na hintleachta saorga, leagfar béim leis an mbeart ar an intleacht shaorga (ach ní fhágfar amach gníomhaíochtaí maidir le teicneolaíochtaí eile a bhfuil baint ar leith acu leis an earnáil dhigiteach sna réigiúin roghnaithe). Go háirithe, d’fhéadfadh ealaíontóirí cabhrú le dul i ngleic leis an mbréagaisnéis, dúshlán mór atá roimh gach tír ar fud an domhain: mar shampla, scéalta bréagacha maidir le galair thógálacha a bhaineann leis an athrú aeráide, nó cúiseanna an ghanntanais bhia a mbíonn tionchar díreach acu ar an gcomhtháthú sóisialta.