Il-premjijiet jirrikonoxxu l-kisbiet fil-qasam tal-wirt kulturali fl-Ewropa kollha f’5 kategoriji ewlenin:
- Konservazzjoni u Użu mill-Ġdid Adattiv
- Riċerka
- Edukazzjoni, Taħriġ u Ħiliet
- Involviment taċ-Ċittadini u Sensibilizzazzjoni
- Promoturi tal-Wirt
Kull sena jkun hemm sa 30 proġett li jirnexxu sew fil-qasam tal-wirt kulturali li jirċievu l-Premju tal-Unjoni Ewropea għall-Wirt Kulturali/il-Premjijiet Europa Nostra.
Il-Gran Prix
Fost il-proġetti u l-inizjattivi rebbieħa, ikun hemm sa ħamsa li jitqiesu eċċezzjonali, u kull wieħed minnhom jingħata premju ta’ €10,000 fi flus
Il-Premju tal-Għażla Pubblika
Barra minn hekk, kulħadd huwa mistieden jivvota online għall-proġett jew għall-inizjattiva favorita tiegħu fost ir-rebbieħa. Ir-rebbieħ tal-Premju tal-Għażla Pubblika jirċievi wkoll €10,000.
Europa Nostra, is-sieħeb organizzattiv tal-Premjijiet
Europa Nostra ilha tamministra l-premjijiet f’isem l-Unjoni Ewropea mill-2022. Hi l-vuċi Ewropea tas-soċjetà ċivili impenjata li tissalvagwardja u tippromwovi l-wirt kulturali u naturali.
L-għan tal-premju
Il-premjijiet għandhom l-għan li jidentifikaw u jippromwovu l-aħjar prattiki fil-konservazzjoni tal-wirt kulturali. Huma jirrikonoxxu wkoll żviluppi innovattivi u għarfien ġdid fil-kura u l-promozzjoni tal-wirt kulturali tanġibbli u intanġibbli. F’dan ir-rigward, il-premju tal-UE mhux biss jirrifletti bis-sħiħ l-objettivi tas-Sena Ewropea tal-Wirt Kulturali 2018, iżda jkompli jfakkar l-għanijiet tagħha.
Il-premjijiet jippermettu wkoll li l-esperjenzi u l-informazzjoni jiġu skambjati u ttrasferiti bejn il-fruntieri u l-komunitajiet fl-Ewropa u lil hinn minnha. Dawn jgħinu biex jintwera l-valur li l-wirt kulturali għandu għall-kultura, l-ekonomija, is-soċjetà u l-ambjent fl-Ewropa.